D’Kommissiounen

All regional Grondschouldirektioun huet eng Inklusiounskommissioun (CI).

Si ka vun den Elteren oder dem Léierpersonal mam schrëftlechen Accord vun den Elteren an Usproch geholl ginn.

D’Aufgab vun der Inklusiounskommissioun (CI) besteet doran:

• d’Elteren iwwer déi verschidde Betreiungsmoossnamen ze informéieren
• dem Schüler wann néideg déi entspriechend gëeegent Moossnamen ze proposéieren
• d’Ekipp fir d’Ënnerstëtzung vu Schüler mat spezifesche Besoinen (ESEB) vun der Regionaldirektioun ze beoptragen, eng Diagnos vun de Besoine vum Schüler ze erstellen.

Dës Moossname ginn am Schüler sengem individualiséierte Betreiungsplang, dee vun der CI zesumme mat den Elteren ugeholl gëtt, festgehalen.

D’CI suergt fir d’Ëmsetzung vum individualiséierte Betreiungsplang an evaluéiert en all Joer, fir d’Upassunge virzehuelen, déi als néideg ugesi ginn, fir de schoulesche Fortschrëtt vum Schüler sécherzestellen.

D’CI leet eng Bezuchspersoun fir all Schüler fest. Dës Persoun ass den Uspriechpartner fir de Schüler a seng Elteren.

D’CI ka sech mam schrëftlechen Accord vun den Elteren och un d’Commission nationale d’inclusion (CNI) wenden, wa se der Usiicht ass, datt de Schüler eng spezialiséiert Betreiung brauch.

Am Secondaire huet all Lycée eng Inklusiounskommissioun (CI).

Si ka vun den Elteren oder vum groussjärege Schüler an Usproch geholl ginn. Si kann och vum Service psychosocial et d’accompagnement scolaires, vum Direkter oder vun der Ekipp fir d’Ënnerstëtzung vu Schüler mat spezifesche Besoinen (ESEB) vum Lycée mam schrëftlechen Accord vun den Elteren oder vum groussjärege Schüler an Usproch geholl ginn.

D’Aufgab vun der Inklusiounskommissioun (CI) besteet doran:

• d’Schüler an d’Elteren iwwer déi verschidde Betreiungsmoossnamen ze informéieren
• dem Schüler wann néideg déi entspriechend gëeegent Moossnamen ze proposéieren
• d’Ekipp fir d’Ënnerstëtzung vu Schüler mat spezifesche Besoinen (ESEB) vum Lycée ze beoptragen, eng Diagnos vun de Besoine vum Schüler ze erstellen.

Dës Moossname ginn am Schüler sengem individualiséierten (Aus-)Bildungsplang (PFI), dee vun der CI zesumme mam Schüler a mat den Elteren ugeholl gëtt, festgehalen.

D’CI iwwerwaacht d’Ëmsetzung vum individualiséierten (Aus-)Bildungsplang (PFI) an evaluéiert en all Joer, fir d’Upassunge virzehuelen, déi als néideg ugesi ginn, fir de schoulesche Fortschrëtt vum Schüler sécherzestellen.

D’CI leet eng Bezuchspersoun fir all Schüler fest. Dës Persoun ass den Uspriechpartner fir de Schüler, seng Elteren an d’Persounen, déi mat der Ëmsetzung vum individualiséierten (Aus-)Bildungsplang (PFI) beoptraagt sinn.

Ënner der Konditioun, datt d’Elteren oder de groussjärege Schüler hiren Accord ginn hunn, kann d’CI d’Commission des aménagements raisonnables (CAR) mat abezéien, wa si der Meenung ass, datt räsonabel Amenagementer fir de Schüler noutwendeg sinn.

D’CI ka sech mam schrëftlechen Accord vun den Elteren oder dem groussjärege Schüler och un d’Commission nationale d’inclusion (CNI) wenden, wa se der Usiicht ass, datt de Schüler eng spezialiséiert Betreiung brauch.

D’Commission des aménagements raisonnables (CAR) riicht sech un d’Schüler aus dem Secondaire an der Erwuessenebildung. Si ka kontaktéiert ginn, fir d’Léierëmfeld un dem Schüler seng spezifesch Besoinen unzepassen, fir datt en d’Kompetenzen, déi e sech ugëeegent huet, optimal asetze kann.

D’Commission des aménagements raisonnables (CAR) huet den Optrag, räsonabel Amenagementer ze decidéiere fir:

• d’Schüler aus dem Secondaire
• d’Schüler aus der Erwuessenebildung

D’Inklusiounskommissioun (CI) vum Lycée kann heifir, mam schrëftlechen Accord vun den Elteren oder dem groussjärege Schüler, unhand vun engem Dossier eng motivéiert Demande areechen. Och d’Elteren oder de groussjärege Schüler kënnen eng motivéiert Demande areechen.

Zousätzlech zu de Moossnamen, déi an de Grondschoulen an an de Lycéeën ëmgesat ginn, kann d’CNI mat all Demande befaasst ginn, déi d’Ariichte vun enger spezialiséierter Betreiung duerch een oder méi spezialiséiert psychopedagogesch Kompetenzzentre virgesäit, an zwar:

• eng spezialiséiert ambulant Interventioun
• eng spezialiséiert Scolariséierung
• eng spezialiséiert Betreiung a Form vun enger Reeducatioun oder enger Therapie
• Ateliere fir spezifescht Léieren

D’Inklusiounskommissiounen (CI) an de Grondschoulen a vun de Lycéeën, d’Institutiounen, déi am sozialen, familiären oder therapeutesche Beräich agreéiert sinn, an den Dokter, deen de Schüler behandelt, kënne sech un d’CNI wenden, wann d’Elteren oder de groussjärege Schüler hire schrëftlechen Accord ginn hunn. D’Elteren an déi groussjäreg Schüler kënne sech mat hirer Demande och direkt un d’CNI wenden.